হিন্দী সাংবাদিকতাৰ ২০০ বছৰ পূর্তি উপলক্ষে স্মাৰক ডাক টিকট মুকলি

নতুন দিল্লীত অনুষ্ঠিত হ’ল ‘হিন্দী সাংবাদিকতা দ্বিশতাব্দী মহোৎসৱ’।
কেন্দ্ৰীয় মন্ত্ৰী জ্যোতিৰাদিত্য সিন্ধিয়াই ‘উদন্ত মাৰ্তণ্ড’ৰ স্মাৰক ডাক টিকট আৰু ফাৰ্ষ্ট ডে কভাৰ মুকলি কৰে।
‘হিন্দী সাংবাদিকতা : ২০০ বছৰৰ মহাগাথা’ শীৰ্ষক গ্ৰন্থ উন্মোচন।
স্বাধীনতা আন্দোলন আৰু ৰাষ্ট্ৰীয় চেতনাত হিন্দী সাংবাদিকতাৰ ঐতিহাসিক অৱদানৰ প্ৰশংসা।
AI, ফেক নিউজ আৰু ডীপফেকৰ যুগত সত্যনিষ্ঠ সাংবাদিকতাৰ গুৰুত্বৰ ওপৰত জোৰ।
নতুন দিল্লীত দ্বিশতাব্দী মহোৎসৱৰ জাকজমকীয়া আয়োজন

‘উদন্ত মাৰ্তণ্ড’ক সন্মান জনাই কেন্দ্ৰীয় মন্ত্ৰী জ্যোতিৰাদিত্য সিন্ধিয়াৰ বিশেষ উদ্যোগ

সমগ্ৰ সমাচাৰ সেৱা
দিল্লী, ৩১ মে’: নতুন দিল্লীৰ ইন্দিৰা গান্ধী ৰাষ্ট্ৰীয় কলা কেন্দ্ৰত শনিবাৰে অনুষ্ঠিত ‘হিন্দী সাংবাদিকতা দ্বিশতাব্দী মহোৎসৱ’ত অংশগ্ৰহণ কৰে কেন্দ্ৰীয় যোগাযোগ আৰু উত্তৰ-পূৰ্বাঞ্চল উন্নয়ন মন্ত্ৰী জ্যোতিৰাদিত্য সিন্ধিয়া। অনুষ্ঠানত তেখেতে হিন্দী সাংবাদিকতাৰ ২০০ বছৰৰ গৌৰৱময় যাত্ৰাক সন্মান জনাই ‘উদন্ত মাৰ্তণ্ড’ আলোচনীক উৎসৰ্গিত স্মাৰক ডাক টিকট, ফাৰ্ষ্ট ডে কভাৰ আৰু ‘হিন্দী সাংবাদিকতা : ২০০ বছৰৰ মহাগাথা’ শীৰ্ষক গ্ৰন্থ উন্মোচন কৰে।

অনুষ্ঠানত ভাষণ প্ৰদান কৰি সিন্ধিয়াই কয় যে হিন্দী সাংবাদিকতা কেৱল সংবাদ প্ৰচাৰৰ মাধ্যম নহয়, বৰং ই ভাৰতৰ ৰাষ্ট্ৰীয় চেতনা, স্বাধীনতা আন্দোলন, সামাজিক জাগৰণ আৰু গণতান্ত্ৰিক মূল্যবোধৰ এক শক্তিশালী বাহক হিচাপে কাম কৰি আহিছে।

তেখেতে উল্লেখ কৰে যে ১৮২৬ চনত পণ্ডিত যুগল কিশোৰ শুক্লাই প্ৰকাশ কৰা ‘উদন্ত মাৰ্তণ্ড’ই ভাৰতীয় সমাজক নিজস্ব কণ্ঠস্বৰ প্ৰদান কৰিছিল আৰু ৰাষ্ট্ৰীয় চেতনাৰ এক দীপ্তিশালী শিখা জ্বলাই তুলিছিল, যাৰ প্ৰভাৱ আজিও অনুভূত হয়।

সিন্ধিয়াই কয় যে স্বাধীনতা সংগ্ৰামৰ সময়ত হিন্দী সাংবাদিকতাই জনসচেতনতা গঢ়ি তোলাত অগ্ৰণী ভূমিকা পালন কৰিছিল। বাল গঙ্গাধৰ তিলকৰ ‘কেশৰী’, গণেশ শংকৰ বিদ্যাৰ্থীৰ ‘প্ৰতাপ’ আৰু পণ্ডিত মদন মোহন মালৱীয়ৰ ‘অভ্যুদয়’ৰ দৰে প্ৰকাশনসমূহে ৰাষ্ট্ৰীয়তাবাদ আৰু জনচেতনাৰ ক্ষেত্ৰত নতুন শক্তি সঞ্চাৰ কৰিছিল।
তেখেতে মন্তব্য কৰে যে ভাৰতত সাংবাদিকতা কেৱল এটা পেছা নহয়, ই ৰাষ্ট্ৰ নিৰ্মাণৰ এক শক্তিশালী আন্দোলন।
বৰ্তমান সময়ৰ প্ৰত্যাহ্বানসমূহৰ কথা উল্লেখ কৰি কেন্দ্ৰীয় মন্ত্ৰীগৰাকীয়ে কয় যে কৃত্ৰিম বুদ্ধিমত্তা (AI), ফেক নিউজ, ডীপফেক আৰু বিভ্ৰান্তিকৰ তথ্যৰ যুগত সাংবাদিকতাৰ দায়িত্ব আগতকৈ অধিক বৃদ্ধি পাইছে।

তেখেতে কয়, “আজিৰ সময়ত সত্য তথ্য চিনাক্ত কৰাটোৱেই আটাইতকৈ ডাঙৰ প্ৰত্যাহ্বান। এনে পৰিস্থিতিত নিৰপেক্ষ, বিশ্বাসযোগ্য আৰু তথ্যভিত্তিক সাংবাদিকতাই গণতন্ত্ৰৰ শক্তি বৃদ্ধি কৰে।”

স্মাৰক ডাক টিকট আৰু ফাৰ্ষ্ট ডে কভাৰ মুকলিৰ জৰিয়তে ভাৰতৰ দুটা শতিকাজুৰি বিস্তৃত সাংবাদিকতা ঐতিহ্যক সন্মান জনোৱা হৈছে বুলি উল্লেখ কৰে সিন্ধিয়াই। তেখেতে কয় যে এই উদ্যোগে সমাজক পথ প্ৰদৰ্শন কৰি অহা বৈচাৰিক আৰু জনজাগৰণৰ ঐতিহ্যক নতুনকৈ স্মৰণ কৰাৰ সুযোগ প্ৰদান কৰিছে।

অনুষ্ঠানত ৰাম বাহাদুৰ ৰায় আৰু বিজয় দত্ত শ্ৰীধৰৰ বিশেষ অৱদানৰ শলাগ লয় কেন্দ্ৰীয় মন্ত্ৰীগৰাকীয়ে। তেখেতে কয় যে হিন্দী সাংবাদিকতাৰ ২০০ বছৰৰ এই গৌৰৱগাথাই আগন্তুক প্ৰজন্মক অনুপ্ৰেৰণা যোগোৱাৰ লগতে ৰাষ্ট্ৰ নিৰ্মাণৰ পথ অধিক সুদৃঢ় কৰি তুলিব।
দেশৰ বিভিন্ন প্ৰান্তৰ জ্যেষ্ঠ সাংবাদিক, সম্পাদক, সাহিত্যিক, শিক্ষাবিদ আৰু বিশিষ্ট ব্যক্তিসকল এই অনুষ্ঠানত উপস্থিত থাকে।