গুৱাহাটী : ভঙাগড়ৰ ৰুদ্ৰাক্ষ মলত নৱ-বিবাহিত যুৱকৰ ৰহস্যজনক মৃত্যু
- ভঙাগড়ৰ ৰুদ্ৰাক্ষ মলত সংঘটিত ৰহস্যজনক ঘটনা
- সপ্তম মহলাৰ পৰা পৰি মৃত্যু নৱ-বিবাহিত যুৱকৰ
- মৃত যুৱকজন সোণাপুৰৰ সিদ্ধান্ত দাস
- সপ্তম মহলাৰ পৰা চতুৰ্থ মহলালৈ পৰিছিল যুৱকজন
- মুমূৰ্ষু অৱস্থাত হাস্পতাললৈ নিয়া হৈছিল
- চিকিৎসকে হাস্পতালত মৃত ঘোষণা কৰে
সমগ্ৰ সামাচাৰ সেৱা
গুৱাহাটী, ১১ এপ্ৰিল: গুৱাহাটী মহানগৰৰ ভঙাগড়স্থিত ৰুদ্ৰাক্ষ মলত সংঘটিত এক ৰহস্যজনক ঘটনাই অঞ্চলটোত চাঞ্চল্যৰ সৃষ্টি কৰিছে। শনিবাৰে সংঘটিত এই ঘটনাত সোণাপুৰৰ নৱ-বিবাহিত যুৱক সিদ্ধান্ত দাসৰ মৃত্যু হয়।
উপলব্ধ তথ্য অনুসৰি, সিদ্ধান্ত দাসে ৰুদ্ৰাক্ষ মলৰ সপ্তম মহলাৰ পৰা পৰি যায়। তেওঁ সপ্তম মহলাৰ পৰা চতুৰ্থ মহলালৈ পৰি গুৰুতৰভাৱে আঘাতপ্ৰাপ্ত হয়। ঘটনাৰ পিছতেই উপস্থিত লোকসকলে তৎপৰতাৰে তেওঁক মুমূৰ্ষু অৱস্থাত ওচৰৰ হাস্পতাললৈ লৈ যায়।
কিন্তু চিকিৎসকৰ সকলো প্ৰচেষ্টাৰ পিছতো তেওঁক বচাব নোৱাৰি। হাস্পতালত উপস্থিত চিকিৎসকে সিদ্ধান্ত দাসক মৃত ঘোষণা কৰে।
ইতিমধ্যে ঘটনাটোক কেন্দ্ৰ কৰি অঞ্চলটোত শোকৰ ছাঁ পৰিছে। নৱ-বিবাহিত এজন যুৱকৰ এই অকাল মৃত্যুৰ ঘটনাই পৰিয়ালৰ লগতে স্থানীয় লোকসকলকো গভীৰভাৱে আঘাত কৰিছে।
ঘটনাটো আত্মহত্যা নে দুৰ্ঘটনা—এই সন্দৰ্ভত আৰক্ষীয়ে তদন্ত আৰম্ভ কৰিছে। ঘটনাৰ প্রকৃত কাৰণ এতিয়াও স্পষ্ট হোৱা নাই যদিও আৰক্ষীয়ে বিভিন্ন দিশত অনুসন্ধান অব্যাহত ৰাখিছে।
About The Author
