নিউ বঙাইগাঁও ৰেলৱে ষ্টেচনত সোণ জব্দ, এজন আটক
- প্ৰায় ৫৮২ গ্ৰাম সোণ জব্দ
- অভিযুক্ত আমাৰ আলী আটক
- বৰপেটাৰ পৰা বিহাৰলৈ নিয়াৰ সন্দেহ
- বৃহৎ চোৰাং সৰবৰাহ চক্ৰৰ সৈতে সংযোগৰ তদন্ত অব্যাহত
উত্তৰ-পূব এক্সপ্ৰেছত বৰপেটাৰ পৰা বিহাৰলৈ নিয়াৰ সময়তে ৰেলৱে আৰক্ষীৰ অভিযান
সমগ্ৰ সমাচাৰ সেৱা
অসম,২৩ এপ্ৰিল: অসমৰ নিউ বঙাইগাঁও ৰেলৱে ষ্টেচনত ৰেলৱে আৰক্ষীয়ে চলোৱা এটা বিশেষ অভিযানত ১ কোটি টকাৰ অধিক মূল্যৰ সোণ জব্দ কৰাৰ লগতে এজন সন্দেহভাজন ব্যক্তিক আটক কৰিবলৈ সক্ষম হয়।
আটক কৰা ব্যক্তিজনক আমাৰ আলী বুলি চিনাক্ত কৰা হৈছে। আৰক্ষীৰ সূত্ৰ অনুসৰি, তেওঁৰ পৰা প্ৰায় ৫৮২ গ্ৰাম সোণ উদ্ধাৰ কৰা হৈছে। এই সোণখিনি বৰপেটাৰ পৰা বিহাৰলৈ ডাউন উত্তৰ-পূব এক্সপ্ৰেছযোগে লৈ যোৱা হৈছিল বুলি সন্দেহ কৰা হৈছে।
গোপন তথ্যৰ ভিত্তিত ৰেলৱে আৰক্ষীয়ে ষ্টেচনত অভিযান চলাই সন্দেহভাজনজনক আটক কৰে আৰু তেওঁৰ দখলৰ পৰা সোণখিনি জব্দ কৰে। প্ৰাথমিক অনুমান অনুসৰি, জব্দ কৰা সোণখিনিৰ বজাৰ মূল্য ১ কোটি টকাৰো অধিক।
এই ঘটনাৰ সৈতে কোনো বৃহৎ চোৰাং সৰবৰাহ চক্ৰ জড়িত আছে নে নাই সেই সন্দৰ্ভতো আৰক্ষীয়ে তদন্ত আৰম্ভ কৰিছে। সংশ্লিষ্ট ব্যক্তিজনৰ পৰা অধিক তথ্য সংগ্ৰহৰ বাবে সোধ-পোছ অব্যাহত ৰাখিছে আৰক্ষীয়ে।
এই ঘটনাই অঞ্চলটোত চোৰাং সৰবৰাহ কাৰ্যকলাপৰ সম্ভাৱ্য উপস্থিতিক লৈ পুনৰ চিন্তাৰ সৃষ্টি কৰিছে বুলি আৰক্ষী মহলে জানিবলৈ দিয়ে।
About The Author
