গুৱাহাটীৰ ‘Exoro’ ৰুফটপ পাবৰ লাইচেন্স বাতিল
- অনুমতিপ্ৰাপ্ত সময় অতিক্ৰম কৰি চলিছিল পাব।
- দুৰ্ঘটনাৰ পূৰ্বে ভুক্তভোগীসকলৰ উপস্থিতিৰ ভিডিয়ো প্ৰকাশ।
- উপায়ুক্তৰ কঠোৰ ব্যৱস্থা, লাইচেন্স বাতিল।
- এক্সাইজ বিভাগক তদন্তৰ নিৰ্দেশ।
- আইন উলংঘনৰ অভিযোগে FIR দাখিল।
নিয়ম ভংগ কৰি ৰাতি ৩ বজালৈ চলিছিল ব্যৱসায়। ১৫ দিনৰ ভিতৰত তদন্তৰ নিৰ্দেশ।
সমগ্ৰ সমাচাৰ সেৱা
গুৱাহাটী, ৩০ এপ্ৰিল: গুৱাহাটীৰ মাঠঘৰীয়া পথ দুর্ঘটনাৰ পাছত প্রশাসনে কঠোৰ পদক্ষেপ গ্ৰহণ কৰিছে। কামৰূপ মহানগৰ জিলা প্রশাসনে বুধবাৰে গুৱাহাটীৰ ভঙাগড়স্থিত জনপ্ৰিয় ৰুফটপ পাব ‘Exoro’ ৰ লাইচেন্স বাতিল কৰে। অভিযোগ অনুসাৰে, প্ৰতিষ্ঠানটোৱে এক্সাইজ নিয়ম অনুসৰি অনুমতিপ্ৰাপ্ত সময় অতিক্রম কৰি গভীৰ নিশালৈ ব্যৱসায় চলাই আহিছিল।
জিলা উপায়ুক্ত স্বপ্নীল পলৰ নিৰ্দেশ অনুসৰি, পাবখন ৰাতি ১২:৩০ বজালৈহে খোলা থাকিব পাৰিছিল; কিন্তু ভিডিয়ো প্ৰমাণ অনুসৰি ৰাতি ৩ বজালৈ চলি আছিল। এই গুৰুত্বপূর্ণ নিয়ম ভংগৰ বাবেই লাইচেন্স বাতিল কৰা হয়।
এই সিদ্ধান্তটো মাঠঘৰীয়া দুর্ঘটনাৰ সৈতে জড়িত ভিডিয়ো ফুটেজ প্ৰকাশ পোৱাৰ পাছত লোৱা হয়। সেই ফুটেজত দেখা গৈছিল যে দুৰ্ঘটনাত পতিত হোৱা লোকসকল এই প্ৰতিষ্ঠানৰ পৰা ওলাই আহিছিল।
ইফালে, গুৱাহাটী উচ্চ ন্যায়ালয়ৰ অধিবক্তা গীতিমা বৰাই নুনমাটি থানাত পাবখনৰ বিৰুদ্ধে এফআইআৰ দাখিল কৰে। অভিযোগ অনুসাৰে, প্ৰতিষ্ঠানটোৱে আইন উলংঘন কৰি গ্ৰাহকক সেৱা আগবঢ়াইছিল। লগতে এক্সাইজ বিভাগৰ কিছু বিষয়াৰ ভূমিকাও প্ৰশ্নৰ সন্মুখীন হৈছে।
উপায়ুক্তই এক্সাইজ বিভাগক এই সন্দৰ্ভত বিশদ তদন্ত চলাই ১৫ দিনৰ ভিতৰত প্ৰতিবেদন দাখিল কৰিবলৈ নিৰ্দেশ দিছে।
এই ঘটনাই গুৱাহাটীৰ বাৰ আৰু পাবসমূহৰ নিশা সময়ৰ নিয়ম মানি চলাৰ ওপৰত পুনৰ গুৰুত্ব আৰোপ কৰিছে।
About The Author
