তামুলপুৰৰ চাহ বাগিচাত মেলেৰিয়াৰ সংকট, এমাহত আক্রান্ত ৯৫ জন

তামুলপুৰ জিলাৰ একাধিক চাহ বাগিচাত মেলেৰিয়াৰ সংক্রমণ বৃদ্ধি
এমাহত ৯৫ জন Plasmodium Vivax (PV) মেলেৰিয়াত আক্রান্ত
এতিয়ালৈ কোনো মৃত্যুৰ খবৰ নাই
স্বাস্থ্য বিভাগে আৰম্ভ কৰিছে বিশেষ নজৰদাৰী আৰু ফগিং অভিযান
বাসিন্দাসকলক সজাগ থাকিবলৈ আহ্বান BTC প্ৰশাসনৰ

চাহ বাগিচা অঞ্চলত স্বাস্থ্য বিভাগৰ সতৰ্কতা বৃদ্ধি

সমগ্ৰ সমাচাৰ সেৱা
তামুলপুৰ, ১৭ মে’: অসমৰ তামুলপুৰ জিলাৰ কেইবাটাও চাহ বাগিচা অঞ্চলত মেলেৰিয়াৰ সংক্রমণ হঠাতে বৃদ্ধি পোৱাত স্বাস্থ্য বিভাগে উচ্চ সতৰ্কতা জাৰি কৰিছে। বিগত এটা মাহত অন্ততঃ ৯৫ জন লোক Plasmodium Vivax (PV) মেলেৰিয়াত আক্রান্ত হোৱা বুলি জানিব পৰা গৈছে।

সংক্রমণ বিশেষকৈ কালচিনি চাহ বাগিচাৰ ১২ নম্বৰ লাইন, ২ নম্বৰ পিপলানি চাহ বাগিচা আৰু নাগ্ৰীজুলি চাহ বাগিচা সংলগ্ন অঞ্চলত অধিক দেখা গৈছে। ইয়াৰ পিছতে জিলা স্বাস্থ্য বিভাগে ব্যাপক পৰ্যবেক্ষণ, স্বাস্থ্য পৰীক্ষা আৰু নিয়ন্ত্ৰণমূলক ব্যৱস্থা আৰম্ভ কৰিছে।

জিলা মেলেৰিয়া বিষয়া প্ৰদীপ হালৈয়ে জানিবলৈ দিয়ে যে আক্রান্তসকলৰ প্ৰায় ৫০ শতাংশই ইতিমধ্যে চিকিৎসা সম্পূৰ্ণ কৰিছে। বাকীসকল চিকিৎসাধীন অৱস্থাত আছে যদিও সকলো ৰোগীয়েই সুস্থতাৰ দিশে আগবাঢ়িছে।
স্বাস্থ্য বিভাগে অঞ্চলসমূহত বিশেষ শিবিৰ আয়োজন কৰি মেলেৰিয়া পৰীক্ষা, ঔষধ বিতৰণ আৰু সজাগতা অভিযান চলাই আছে। লগতে ডেল্টামেথ্ৰিন কীটনাশক স্প্ৰে, ফগিং অভিযান আৰু মশাৰী বিতৰণৰ ব্যৱস্থাও গ্ৰহণ কৰা হৈছে।

BTCৰ কাৰ্যবাহী সদস্য লক্ষী দাসে বাসিন্দাসকলক সাৱধানতা অৱলম্বন কৰিবলৈ আহ্বান জনাইছে। তেওঁ পৰিষ্কাৰ খোৱা পানী ব্যৱহাৰ, স্বাস্থ্য শিবিৰত অংশগ্ৰহণ আৰু স্বাস্থ্য বিভাগৰ সৈতে সহযোগিতা কৰিবলৈ অনুৰোধ জনায়।