অসমৰ ষ্টাৰ্টআপ আৰু AI খণ্ড শক্তিশালীকৰণৰ দিশত AISF-ৰ গুৰুত্বপূৰ্ণ সিদ্ধান্ত
- AISF-ৰ তৃতীয় ব’ৰ্ড বৈঠকত একাধিক কৌশলগত পদক্ষেপ অনুমোদন
- অসমত ₹৪০ কোটি ব্যয়ে India AI Centre of Excellence স্থাপনৰ অপাৰেচনেল মডেল অনুমোদিত
- ৰাজ্যৰ ষ্টাৰ্টআপ পৰিবেশত ইতিমধ্যে ৪৮৯টা ষ্টাৰ্টআপ নিবন্ধিত, ৭১৪টা নিয়োগ সৃষ্টি
AI আৰু উদ্ভাৱনৰ ক্ষেত্ৰত অসমৰ নতুন পদক্ষেপ
সমগ্ৰ সমাচাৰ সেৱা
গুৱাহাটী, ২৩ মে’: গুৱাহাটীত অনুষ্ঠিত অসম ইন’ভেচন এণ্ড ষ্টাৰ্টআপ ফাউণ্ডেচন (AISF)-ৰ তৃতীয় ব’ৰ্ড বৈঠকত ৰাজ্যৰ ষ্টাৰ্টআপ আৰু উদ্ভাৱন পৰিবেশ শক্তিশালী কৰাৰ লক্ষ্যৰে কেইবাটাও গুৰুত্বপূৰ্ণ কৌশলগত পদক্ষেপ অনুমোদন কৰা হয়। বৈঠকত AISF-ৰ প্ৰাতিষ্ঠানিক অগ্ৰগতি পৰ্যালোচনা কৰাৰ লগতে নতুন উদ্যোগসমূহৰ বিষয়ে আলোচনা কৰা হয়।
বৈঠকত IndiaAI Mission-ৰ অধীনত স্থাপন হ’বলগীয়া India AI Centre of Excellence–Assam (AI-CoE Assam)-ৰ অপাৰেচনেল মডেল অনুমোদন কৰা হয়। এই প্ৰকল্পৰ বাবে চাৰি বছৰত ₹৪০ কোটি ব্যয় ধাৰ্য কৰা হৈছে, য’ত ৯০:১০ অনুপাতত অৰ্থায়ন কৰা হ’ব। এই কেন্দ্ৰই AI-ভিত্তিক উদ্ভাৱন ত্বৰান্বিত কৰাৰ লগতে জনসেৱা উন্নত কৰা, প্ৰযুক্তিগত দক্ষ মানৱ সম্পদ গঢ়ি তোলা আৰু ভাৰতৰ AI পৰিবেশত অসমক এক গুৰুত্বপূৰ্ণ অংশীদাৰ হিচাপে প্ৰতিষ্ঠা কৰাত সহায় কৰিব।
AISF-এ ব’ৰ্ডক অৱগত কৰে যে ৰাজ্যত এতিয়ালৈকে ৪৮৯টা ষ্টাৰ্টআপ নিবন্ধিত হৈছে, যাৰ জৰিয়তে ৭১৪টা প্ৰত্যক্ষ আৰু পৰোক্ষ নিয়োগ সৃষ্টি হৈছে। লগতে ২২টা সক্ৰিয় ইক’চিষ্টেম অংশীদাৰিত্ব গঢ়ি উঠিছে।
বৈঠকত AISF-ৰ সাম্প্ৰতিক পদক্ষেপসমূহ, যেনে ষ্টাৰ্টআপ ইনকিউবেচন, বিনিয়োগকাৰীৰ সৈতে সংযোগ, কৌশলগত অংশীদাৰিত্ব আৰু Assam Startup and Innovation Policy-ৰ অধীনত কাৰ্যসূচীসমূহৰ অগ্ৰগতি পৰ্যালোচনা কৰা হয়।
ইয়াৰ উপৰিও, IIT Guwahati Technology Innovation Centre (IITG-TIC)-ৰ সহযোগত চলি থকা Assam Startup Incubation Programme-ৰ অগ্ৰগতি, শিক্ষানুষ্ঠানসমূহত ইনকিউবেচন অবকাঠামো আৰু উদ্যোগিতা সহায় পদক্ষেপসমূহো বৈঠকত আলোচনা কৰা হয়।
About The Author
