মুখ্যমন্ত্ৰী : ৫ মে’ত “ফায়াৰিং লাইন”ত থাকিব পাৰে গুৱাহাটী আৰক্ষী আয়ুক্ত
- মুখ্যমন্ত্ৰী ড° হিমন্ত বিশ্ব শৰ্মাৰ গুৱাহাটী আৰক্ষীৰ ওপৰত তীব্ৰ অসন্তোষ
- ৫ মে’ত আৰক্ষী আয়ুক্তৰ বিৰুদ্ধে ব্যৱস্থা লোৱাৰ ইঙ্গিত
- পবন খেড়াৰ গুৱাহাটী ত্যাগক লৈ প্ৰশ্ন
- ৰিণিকি ভূঞা শৰ্মাৰ অভিযোগৰ আধাৰত এফআইআৰ
সমগ্ৰ সামাচাৰ সেৱা
গুৱাহাটী,১৬ এপ্ৰিল: অসমৰ মুখ্যমন্ত্ৰী মুখ্যমন্ত্ৰী ড° হিমন্ত বিশ্ব শৰ্মায়ে গুৱাহাটী আৰক্ষীৰ আয়ুক্তৰ বিৰুদ্ধে সম্ভাৱ্য ব্যৱস্থা গ্ৰহণৰ ইঙ্গিত দি ৰাজনৈতিক পৰিসৰত তীব্ৰ চাঞ্চল্য সৃষ্টি কৰিছে। এক সংবাদ চেনেলক দিয়া সাক্ষাৎকাৰত মুখ্যমন্ত্ৰীয়ে কটাক্ষ কৰি কয় যে, যদি পুনৰ চৰকাৰ গঠন কৰে, তেন্তে ৫ মে’ত আৰক্ষী আয়ুক্ত “তেওঁৰ ফায়াৰিং লাইন”ত থাকিব।
মুখ্যমন্ত্ৰীয়ে অভিযোগ কৰে যে, পবন খেড়াৰ বিৰুদ্ধে নিশা ১২ বজাত এফআইআৰ দাখিল হোৱাৰ পিছতো পুৱা ৬ বজাৰ ভিতৰতে তেওঁ গুৱাহাটীৰ পৰা ওলাই যাব পাৰিলে, যাৰ বাবে আৰক্ষীৰ ভূমিকা সন্দেহজনক বুলি তেওঁ মন্তব্য কৰে।
এই সন্দৰ্ভত মুখ্যমন্ত্ৰীয়ে কয়, নিৰ্বাচনৰ সময়ত প্ৰযোজ্য Model Code of Conductৰ বাবে গৃহমন্ত্ৰী হিচাপে তেওঁ সেই সময়ত হস্তক্ষেপ কৰিব নোৱাৰিলে। তেওঁ লগতে কয়, “মই পবন খেড়াৰ ওপৰতকৈ অধিক ক্ষোভিত অসম আৰক্ষীৰ ওপৰত।”
বৰ্তমান গুৱাহাটীৰ আৰক্ষী আয়ুক্ত হিচাপে কৰ্তব্যৰত আছে পাৰ্থ সাৰথি মহন্ত , যিয়ে ২০২৫ চনৰ জানুৱাৰীত দায়িত্ব গ্ৰহণ কৰিছিল।
উল্লেখ্য যে, এই বিতৰ্কৰ মূল কাৰণ হৈছে মুখ্যমন্ত্ৰীৰ পত্নী ৰিণিকি ভূঞা শৰ্মাৰ একাধিক পাছপ’ৰ্ট থকা বুলি উত্থাপিত অভিযোগ। এই অভিযোগ অস্বীকাৰ কৰি ৰিণিকি ভূঞা শৰ্মাই পবন খেড়াৰ বিৰুদ্ধে গুৱাহাটী ক্ৰাইম ব্ৰাঞ্চ থানাত এফআইআৰ দাখিল কৰে।
তেওঁ কয়, “অভিযোগবোৰক হেলাফেলা কৰা নহ’ব। ন্যায় নিশ্চিত হ’ব লাগিব।”
About The Author
