ত্ৰিপুৰা ট্ৰাইবেল এৰিয়াজ অট’নমাছ ডিষ্ট্ৰিক্ট কাউন্সিল (TTAADC) সাধাৰণ নিৰ্বাচন

পুৱা ৯ বজালৈকে প্ৰায় ২১.৫% ভোটদান
প্ৰথম দুটা ঘণ্টাত ২,০৪,৬৭৯ জন ভোটাৰৰ অংশগ্ৰহণ
মহিলা ভোটাৰৰ সংখ্যা পুৰুষতকৈ অধিক
২৮টা সমষ্টিত ১,২৫৭টা ভোটকেন্দ্ৰ স্থাপন
নিৰ্বাচনত মুঠ ১৭৩ জন প্ৰাৰ্থীৰ প্ৰতিদ্বন্দ্বিতা

সমগ্ৰ সামাচাৰ সেৱা
আগৰতলা, ১২ এপ্ৰিল:ত্ৰিপুৰা ট্ৰাইবেল এৰিয়াজ অট’নমাছ ডিষ্ট্ৰিক্ট কাউন্সিল (TTAADC) সাধাৰণ নিৰ্বাচন ২০২৬ত পুৱা ৯ বজালৈকে প্ৰায় ২১.৫ শতাংশ ভোটদান সম্পন্ন হৈছে বুলি চৰকাৰী তথ্যত প্ৰকাশ পাইছে। পুৱা ৭ বজাৰ পৰা ৯ বজাৰ ভিতৰত মুঠ ৯,৫১,৬১৩ জন নিবন্ধিত ভোটাৰৰ ভিতৰত ২,০৪,৬৭৯ জনে নিজৰ ভোটাধিকাৰ প্ৰয়োগ কৰে।
এই সময়ছোৱাত ১,০০,০৫৮ জন পুৰুষ আৰু ১,০৪,৬২১ জন মহিলা ভোটাৰে ভোটদান কৰে, যাৰ ফলত মহিলা ভোটাৰৰ অংশগ্ৰহণ অধিক হোৱা লক্ষ্য কৰা গৈছে।

সমষ্টিভিত্তিকভাৱে কাথালিয়া-মিৰ্জা ৰাজপুৰ, মহাৰাণী-চেলাগাং আৰু ৰামচন্দ্ৰঘাট আদি সংৰক্ষিত জনজাতীয় আসনত প্ৰায় ২৪–২৫ শতাংশ ভোটদান হোৱা দেখা গৈছে। আনহাতে মাচমাৰা, চৌমানু আৰু দাসদা-কাঞ্চনপুৰ আদি সমষ্টিত ভোটদানৰ হাৰ প্ৰায় ২০–২১ শতাংশৰ ভিতৰত সীমাবদ্ধ থাকে। ধামচৰা-জম্পুই সমষ্টিত এতিয়ালৈকে সৰ্বনিম্ন ১৬ শতাংশ ভোটদান ৰেকৰ্ড কৰা হৈছে।

ত্ৰিপুৰা ৰাজ্যিক নিৰ্বাচন আয়োগৰ সচিব অনুৰাগ সেনৰ মতে, ২৮টা সমষ্টিত মুঠ ১,২৫৭টা ভোটকেন্দ্ৰ স্থাপন কৰা হৈছে। নিৰ্বাচনত ১৬টা উপ-বিভাগত অন্তৰ্গত মুঠ ৯,৬২,৫৪৭ জন ভোটাৰ আছে, যাৰ ভিতৰত ৪,৮১,৯৫৯ জন পুৰুষ, ৪,৮০,৫৮২ জন মহিলা আৰু ৬ জন তৃতীয় লিংগৰ ভোটাৰ অন্তৰ্ভুক্ত।
শান্তিপূৰ্ণ ভোটগ্ৰহণ নিশ্চিত কৰিবলৈ সকলো ভোটকেন্দ্ৰত TSR, চিভিল পুলিচ আৰু কেন্দ্ৰীয় সুৰক্ষা বাহিনীৰ ২৪টা কোম্পানী মোতায়েন কৰা হৈছে।