ILP প্ৰয়োগ আৰু অনুপ্ৰৱেশকাৰীক বাধাৰ দাবীত উত্তাল অৰুণাচল

ILP কঠোৰভাৱে প্ৰয়োগৰ দাবীত অৰুণাচলত তীব্ৰ প্ৰতিবাদ
৩৬ ঘণ্টীয়া বন্ধৰ সমৰ্থনত হাজাৰ হাজাৰ লোকৰ অংশগ্ৰহণ
বন্ধ সমৰ্থনকাৰীক আটক কৰাৰ ঘটনাক কেন্দ্ৰ কৰি উত্তেজনা বৃদ্ধি
বিনাচৰ্তে আটক প্ৰতিবাদকাৰীৰ মুক্তিৰ দাবী
ইটানগৰ থানাৰ সন্মুখত ব্যাপক প্ৰতিবাদ আৰু শ্লোগান
আৰক্ষীৰ সৈতে প্ৰতিবাদকাৰীৰ খণ্ডযুদ্ধ, টায়াৰ জ্বলাই বিক্ষোভ
কেইবাখনো গাড়ী ভাঙচুৰ কৰাৰ অভিযোগ
পৰিস্থিতি নিয়ন্ত্ৰণলৈ আনিবলৈ আৰক্ষীৰ কন্দুৱা গেছ প্ৰয়োগ

৩৬ ঘণ্টীয়া বন্ধৰ মাজতে উত্তপ্ত পৰিস্থিতি, বিভিন্ন ঠাইত প্ৰতিবাদ

সমগ্ৰ সমাচাৰ সেৱা
অৰুণাচল প্ৰদেশ, ১৬ মে’:অৰুণাচল প্ৰদেশত Inner Line Permit (ILP) কঠোৰভাৱে প্ৰয়োগ আৰু অবৈধ অনুপ্ৰৱেশ ৰোধৰ দাবীত ৰাজ্যজুৰি ব্যাপক প্ৰতিবাদ আৰম্ভ হৈছে। ৩৬ ঘণ্টীয়া বন্ধৰ আহ্বানৰ মাজতে ৰাজধানী ইটানগৰসহ বিভিন্ন এলেকাত পৰিস্থিতি উত্তপ্ত হৈ উঠে।
প্ৰতিবাদকাৰীসকলে অভিযোগ কৰে যে ৰাজ্যৰ স্বদেশী অধিকাৰ আৰু ভূমি সুৰক্ষাৰ বাবে ILP ব্যৱস্থা অধিক কঠোৰভাৱে কাৰ্যকৰী কৰাটো অত্যন্ত জৰুৰী। “Implement ILP, Protect Indigenous Rights” শ্লোগানেৰে বহু যুৱক-যুৱতী আৰু সংগঠনে ৰাস্তাত ওলাই আহে।

বন্ধ সমৰ্থনকাৰী কেইবাজনো প্ৰতিবাদকাৰীক আৰক্ষীয়ে আটক কৰাৰ পিছতেই উত্তেজনা অধিক বৃদ্ধি পায়। আটক লোকসকলক বিনাচৰ্তে মুক্তি দিয়াৰ দাবীত ইটানগৰ থানাৰ বাহিৰত হাজাৰ হাজাৰ প্ৰতিবাদকাৰী সমবেত হয়।

প্ৰতিবাদ চলাকালীন কিছু ঠাইত টায়াৰ জ্বলাই বিক্ষোভ প্ৰদৰ্শন কৰাৰ লগতে কেইবাখনো যানবাহন ভাঙচুৰ কৰাৰ অভিযোগ উত্থাপিত হৈছে। পৰিস্থিতি নিয়ন্ত্ৰণ কৰিবলৈ আৰক্ষীয়ে কন্দুৱা গেছ প্ৰয়োগ কৰিবলগীয়া হয়।

ইফালে, ৰাজ্য চৰকাৰে জনসাধাৰণক শান্তি বজাই ৰাখিবলৈ আহ্বান জনাইছে আৰু আলোচনাৰ জৰিয়তে সমস্যাৰ সমাধান বিচাৰিবলৈ অনুৰোধ কৰিছে।