উত্তৰ-পূব ভাৰতৰ পৰা আফ্ৰিকালৈ: আমুৰ ফেলকনৰ বিস্ময়কৰ প্ৰব্ৰজন

২০২৫ চনৰ নৱেম্বৰত মণিপুৰৰ তামেংলঙত তিনিটা আমুৰ ফেলকনক চেটেলাইট টেগ কৰা হৈছিল
দুটা ফেলকনে দক্ষিণ আফ্ৰিকাৰ পৰা ভাৰত হৈ প্ৰজননস্থলীৰ দিশে উভতি আহিছে
ছোমালিয়াৰ পৰা উত্তৰ-পূব ভাৰতলৈ ছদিনত প্ৰায় ৬০০০ কিলোমিটাৰ উৰণ
“আলং” নামৰ মাইকী ফেলকন বৰ্তমান আৰব সাগৰৰ ওপৰেৰে ভাৰতৰ পশ্চিম উপকূললৈ আগবাঢ়ি আছে
প্ৰকল্পটো সম্প্ৰদায় নেতৃত্বাধীন সফল সংৰক্ষণ পদক্ষেপ হিচাপে পৰিগণিত

ছদিনত ৬ হাজাৰ কিলোমিটাৰ অবিৰত উৰণে পুনৰ আকৰ্ষণ কৰিলে বিশ্বৰ দৃষ্টি

সমগ্ৰ সমাচাৰ সেৱা
মণিপুৰ, ১৬ মে’: উত্তৰ-পূব ভাৰতত আমুৰ ফেলকন সংৰক্ষণৰ বাবে যোৱা এটা দশক ধৰি চলি থকা প্ৰচেষ্টাই পুনৰ এক উল্লেখযোগ্য সফলতা লাভ কৰিছে। ২০২৫ চনৰ নৱেম্বৰ মাহত মণিপুৰৰ তামেংলঙ জিলাত উৰি আহি ৰোৱাৰ সময়ত তিনিটা আমুৰ ফেলকনক চেটেলাইট টেগ কৰা হৈছিল।

এই টেগিং কাৰ্যসূচীৰ জৰিয়তে চৰাইকেইটাৰ দীঘলীয়া আন্তঃমহাদেশীয় প্ৰব্ৰজনৰ গতিবিধি নিৰীক্ষণ কৰা হৈছে। দক্ষিণ আফ্ৰিকাৰ অ-প্ৰজননস্থলীত চাৰি মাহতকৈ অধিক সময় অতিবাহিত কৰাৰ পিছত দুটা আমুৰ ফেলকনে পুনৰ বসন্তকালীন প্ৰব্ৰজন আৰম্ভ কৰি ভাৰত হৈ সুদূৰ-পূব এছিয়াৰ নিজৰ প্ৰজনন অঞ্চললৈ উভতি আহিছে।

বিশেষকৈ, ছোমালিয়াৰ পৰা উত্তৰ-পূব ভাৰতলৈ আহোঁতে এই চৰাইকেইটাই মাত্ৰ ছদিনত প্ৰায় ৬০০০ কিলোমিটাৰ অবিৰত উৰণ সম্পন্ন কৰিছে। এই বিস্ময়কৰ যাত্ৰাই বিজ্ঞানী আৰু সংৰক্ষণবিদসকলক নতুন তথ্য আৰু অন্তৰ্দৃষ্টি প্ৰদান কৰিছে।

ইফালে “আলং” নামৰ এটি মাইকী আমুৰ ফেলকন বৰ্তমান ভাৰতৰ পশ্চিম উপকূলৰ দিশে উৰি গৈ আছে। চৰাইটিয়ে কালি পুৱাই ছোমালিয়াৰ পৰা উৰণ আৰম্ভ কৰি আৰব সাগৰৰ ওপৰেৰে অগ্ৰসৰ হৈছে। অনুকূল বতাহৰ সহায়ত সাগৰ অতিক্ৰম কৰিবলৈ ইয়াক প্ৰায় তিনিদিনীয়া অবিৰত উৰণ সম্পন্ন কৰিব লাগিব বুলি বিশেষজ্ঞসকলে জানিবলৈ দিয়ে।

পৰিৱেশ, বন আৰু জলবায়ু পৰিৱৰ্তন মন্ত্ৰালয়ৰ পুঁজিৰ সহায়ত চলি থকা এই প্ৰকল্পটো ভাৰতৰ অন্যতম সফল সম্প্ৰদায় নেতৃত্বাধীন সংৰক্ষণ প্ৰচেষ্টা হিচাপে পৰিগণিত হৈছে। এই পদক্ষেপে আমুৰ ফেলকনৰ দৰে দীৰ্ঘ দূৰত্বৰ ট্ৰেন্স-গোলাৰ্ধ প্ৰব্ৰজনকাৰী চৰাইৰ আচৰণ, যাত্ৰাপথ আৰু সংৰক্ষণ কৌশল বুজাত গুৰুত্বপূৰ্ণ ভূমিকা পালন কৰিছে।