অসমৰ কলেজত চুক্তিভিত্তিক কৰ্মচাৰী নিষেধাজ্ঞা: তীব্ৰ প্ৰতিক্ৰিয়া
- চুক্তিভিত্তিক শিক্ষক-কৰ্মচাৰী নিযুক্তিত নিষেধাজ্ঞা
- AICCTUৰ তীব্ৰ প্ৰতিবাদ আৰু আদেশ প্রত্যাহাৰৰ দাবী
- শিক্ষক সংকটত শিক্ষাৰ মান প্ৰভাৱিত হোৱাৰ আশংকা
- হাজাৰ হাজাৰ যুৱকৰ জীৱিকা সংকটত
উচ্চ শিক্ষা বিভাগৰ নিৰ্দেশত শিক্ষক সংকটৰ আশংকা; ছাত্ৰ-ছাত্ৰীৰ শৈক্ষিক ভবিষ্যত সংকটত
সমগ্ৰ সমাচাৰ সেৱা
গুৱাহাটী, ২৫ এপ্ৰিলঃ অসমৰ উচ্চ শিক্ষা বিভাগে ৰাজ্যৰ প্ৰাদেশিকীকৃত আৰু চৰকাৰী কলেজসমূহত চুক্তিভিত্তিক শিক্ষক আৰু অ-শিক্ষক কৰ্মচাৰী নিযুক্তি নিষিদ্ধ কৰাৰ নিৰ্দেশ জাৰি কৰাত ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছে। এই সিদ্ধান্তৰ বিৰুদ্ধে তীব্ৰ প্ৰতিবাদ জনাইছে অল ইণ্ডিয়া চেণ্ট্ৰেল কাউন্সিল অৱ ট্ৰেড ইউনিয়নছ (AICCTU)ৰ অসম ৰাজ্যিক সমিতিয়ে।
বিভাগীয় নিৰ্দেশনা অনুসৰি, কোনো কলেজে অসংগঠিত পদত চুক্তিভিত্তিক বা এড-হক নিযুক্তি নিদিবলৈ কঢ়া নিৰ্দেশ দিয়া হৈছে। লগতে ইতিমধ্যে নিযুক্ত কৰ্মচাৰীসকলৰ সেৱাও নিয়ম অনুসৰি বন্ধ কৰিবলৈ কোৱা হৈছে। এই ক্ষেত্ৰত অমান্য কৰিলে কঠোৰ ব্যৱস্থা গ্ৰহণ কৰাৰ সতৰ্কবাণীও দিয়া হৈছে।
এই সিদ্ধান্তক “অযৌক্তিক, অমানৱীয় আৰু শিক্ষা ব্যৱস্থাৰ বাবে ধ্বংসাত্মক” বুলি আখ্যা দিয়ে AICCTUৰ নেতা বীৰেণ কলিতা আৰু বলিন্দ্ৰ শইকীয়াই। তেওঁলোকৰ মতে, বহু বছৰ ধৰি সামান্য দৰমহাত সেৱা আগবঢ়াই অহা হাজাৰ হাজাৰ যুৱক-যুৱতীৰ ওপৰত এই সিদ্ধান্তই ভয়ংকৰ প্ৰভাৱ পেলাব।
ইউনিয়নে লগতে সতৰ্ক কৰি কয় যে, এই সিদ্ধান্তৰ ফলত বহু কলেজত শিক্ষক সংকটৰ সৃষ্টি হ’ব পাৰে, যাৰ ফলত ছাত্ৰ-ছাত্ৰীৰ শৈক্ষিক কার্যকলাপত বিঘ্ন ঘটিব। বহু চুক্তিভিত্তিক শিক্ষকেই গুৰুত্বপূর্ণ বিষয়সমূহ পাঠদান কৰাৰ লগতে প্ৰশাসনিক কামতো জড়িত হৈ আছে।
AICCTUয়ে এই আদেশ তৎক্ষণাত প্রত্যাহাৰ কৰাৰ লগতে চুক্তিভিত্তিক কৰ্মচাৰীসকলক নিয়মীয়া কৰাৰ দাবী জনাইছে। লগতে এই সিদ্ধান্তৰ বিৰুদ্ধে সমাজৰ সকলো স্তৰৰ লোকক প্ৰতিবাদত অংশগ্ৰহণ কৰিবলৈ আহ্বান জনাইছে।
এই ঘটনাই অসমৰ উচ্চ শিক্ষা খণ্ডত অনিশ্চয়তাৰ সৃষ্টি কৰাৰ লগতে কলেজসমূহক একেলগে নিয়ম মানি চলা আৰু শিক্ষাৰ ধাৰাবাহিকতা ৰখাৰ ডাঙৰ প্ৰত্যাহ্বানৰ সন্মুখীন কৰিছে।
About The Author
