মঙলদৈৰ চৰকাৰী বিদ্যালয়ত অবৈধ ধন সংগ্ৰহৰ অভিযোগ

বালাবাৰী উচ্চতৰ মাধ্যমিক বিদ্যালয়ত ধন সংগ্ৰহৰ অভিযোগ
ভৰ্তিৰ সময়ত ৩০০ টকাৰ পৰা ১৫০০ টকা লোৱাৰ দাবী
টকা নিদিলে ছাত্ৰ-ছাত্ৰীক বিভিন্ন অজুহাতত উলিয়াই দিয়াৰ অভিযোগ
নামত ভুল কৰি সংশোধনৰ বাবে ২০-২৫ হাজাৰ টকা দাবীৰ অভিযোগ
সংগৃহীত ধনৰ কোনো ৰচিদ নিদিয়াৰ অভিযোগ
ঘটনাক কেন্দ্ৰ কৰি স্থানীয় ৰাইজ আৰু অভিভাৱকৰ প্ৰতিবাদ সভা

অভিভাৱকৰ ক্ষোভ, অধ্যক্ষৰ বিৰুদ্ধে গুৰুতৰ অনিয়মৰ অভিযোগ

সমগ্ৰ সমাচাৰ সেৱা
দৰ‍ং, ৮ মে’: দৰং জিলাৰ মঙলদৈস্থিত বালাবাৰী উচ্চতৰ মাধ্যমিক বিদ্যালয়ত ব্যাপক অনিয়ম আৰু অবৈধ ধন সংগ্ৰহৰ অভিযোগ উত্থাপিত হৈছে। বিদ্যালয়খনৰ অধ্যক্ষ নজৰুল হকৰ বিৰুদ্ধে অভিভাৱক আৰু স্থানীয় ৰাইজে এই গুৰুতৰ অভিযোগ উত্থাপন কৰিছে।

অভিযোগ অনুসৰি, চৰকাৰী বিদ্যালয়ত বিনামূলীয়াকৈ ভৰ্তিৰ নিয়ম থাকিলেও ছাত্ৰ-ছাত্ৰীৰ পৰা ৩০০ টকাৰ পৰা ১৫০০ টকা পৰ্যন্ত ধন সংগ্ৰহ কৰা হৈছে।

অভিভাৱকসকলে দাবী কৰিছে যে যিসকলে এই ধন দিব নোৱাৰে, তেওঁলোকক বিভিন্ন অজুহাত দেখুৱাই বিদ্যালয় এৰিবলৈ বাধ্য কৰা হয়।

ইয়াৰ উপৰিও, কিছুমান অভিভাৱকে অভিযোগ কৰিছে যে ছাত্ৰ-ছাত্ৰীৰ নামত ইচ্ছাকৃতভাৱে ভুল কৰি পিছত সেই ভুল শুধৰাবলৈ ২০ হাজাৰৰ পৰা ২৫ হাজাৰ টকা পৰ্যন্ত দাবী কৰা হয়। সংগৃহীত ধনৰ কোনো ৰচিদ নিদিয়াৰ অভিযোগেও ঘটনাটোক অধিক বিতৰ্কিত কৰি তুলিছে।
ঘটনাক কেন্দ্ৰ কৰি অনুষ্ঠিত এখন ৰাজহুৱা সভাত অভিভাৱক আৰু স্থানীয় লোকসকলে তীব্ৰ ক্ষোভ প্ৰকাশ কৰে। সভাত অধ্যক্ষই বিদ্যালয় চলাবলৈ চৰকাৰী পুঁজি পৰ্যাপ্ত নহয় বুলি মন্তব্য কৰি ধন সংগ্ৰহৰ বিষয়টো সমৰ্থন কৰা বুলি জানিব পৰা গৈছে।

স্থানীয় লোকসকলে জনোৱা মতে, পূৰ্বেও এই বিষয়ত অভিযোগ দাখিল কৰা হৈছিল যদিও এতিয়ালৈ কোনো সঠিক তদন্ত আৰম্ভ হোৱা নাই।