তেজপুৰত ৬–৭ জুনত অনুষ্ঠিত হ’ব ‘তেজপুৰ লিচু উৎসৱ’
- ৬ আৰু ৭ জুনত তেজপুৰত অনুষ্ঠিত হ’ব ‘তেজপুৰ লিচু উৎসৱ’
- উৎসৱৰ পূৰ্বে পাৰুৱা লিচু বাগিচা আৰু পল্টন পুখুৰী লিচু বাগিচা পৰিদৰ্শন জিলা আয়ুক্তৰ
- লিচুৰ বজাৰ সংযোগ বৃদ্ধি আৰু কৃষকৰ অংশগ্ৰহণত গুৰুত্ব
- ‘তেজপুৰ লিচু’ক বিশ্ব পৰ্যায়ত প্ৰচাৰৰ লক্ষ্য
- কৃষি আৰু উদ্যান শস্য খণ্ডক অধিক শক্তিশালী কৰাৰ প্ৰয়াস
উৎসৱৰ প্ৰস্তুতি তীব্ৰ
সমগ্ৰ সমাচাৰ সেৱা
তেজপুৰ, ২৯ মে’: শোণিতপুৰ জিলাৰ অন্যতম বিশেষ কৃষিজ উৎপাদন ‘তেজপুৰ লিচু’ক অধিক জনপ্ৰিয় কৰি তোলাৰ লক্ষ্যৰে অহা ৬ আৰু ৭ জুনত অনুষ্ঠিত হ’ব ‘তেজপুৰ লিচু উৎসৱ’। উৎসৱক লৈ ইতিমধ্যে জিলা প্ৰশাসনে ব্যাপক প্ৰস্তুতি আৰম্ভ কৰিছে।
এই উপলক্ষে আজি শোণিতপুৰ জিলাৰ জিলা আয়ুক্তই পাৰুৱা লিচু বাগিচা আৰু পল্টন পুখুৰী লিচু বাগিচা পৰিদৰ্শন কৰে। পৰিদৰ্শনৰ সময়ত তেওঁ লিচু উৎপাদন, বিপণন ব্যৱস্থা আৰু কৃষকসকলৰ সুবিধা-অসুবিধাৰ বুজ লয়।
জিলা আয়ুক্তই কয় যে, এই উৎসৱৰ জৰিয়তে স্থানীয় লিচু চাষীসকলক অধিক বজাৰ সুবিধা প্ৰদান কৰাৰ লগতে দেশ-বিদেশত ‘তেজপুৰ লিচু’ৰ বিশেষ পৰিচয় গঢ়ি তোলাৰ চেষ্টা কৰা হ’ব। কৃষকসকলৰ সক্ৰিয় অংশগ্ৰহণ নিশ্চিত কৰাৰ ক্ষেত্ৰতো বিশেষ গুৰুত্ব আৰোপ কৰা হৈছে।
উৎসৱৰ জৰিয়তে ‘তেজপুৰ লিচু’ক এক বিশ্বমানৰ কৃষিজ ব্ৰেণ্ড হিচাপে প্ৰতিষ্ঠা কৰাৰ লক্ষ্য গ্ৰহণ কৰা হৈছে। ইয়াৰ ফলত স্থানীয় কৃষকসকল আৰ্থিকভাৱে লাভান্বিত হোৱাৰ লগতে অঞ্চলটোৰ কৃষিভিত্তিক অৰ্থনীতি অধিক শক্তিশালী হ’ব বুলি আশা প্ৰকাশ কৰা হৈছে।
About The Author
