সমগ্ৰ দেশজুৰি ২০ মে’ত ঔষধ বিক্ৰেতাসকলৰ ধৰ্মঘট

২০ মে’ ২০২৬, বুধবাৰে দেশজুৰি কেমিষ্ট আৰু ড্ৰাগিষ্টসকলৰ ধৰ্মঘট
আহ্বান জনাইছে অল ইণ্ডিয়া অৰ্গেনাইজেচন অৱ কেমিষ্টছ এণ্ড ড্ৰাগিষ্টছ (AIOCD)-এ
অনলাইন ঔষধ বিক্ৰী বন্ধ কৰাৰ দাবী
কৰ্প’ৰেট কোম্পানীৰ গভীৰ মূল্য ৰেহাই নীতিৰ বিৰোধিতা
নকল ঔষধ বিক্ৰী ৰোধ কৰাৰ আহ্বান

অনলাইন ঔষধ বিক্ৰী আৰু কৰ্প’ৰেট ডিছকাউণ্টৰ বিৰুদ্ধে AIOCDৰ কঠোৰ পদক্ষেপ

সমগ্ৰ সমাচাৰ সেৱা
অসম, ১৮ মে’: দেশজুৰি কেমিষ্ট আৰু ঔষধ বিক্ৰেতাসকলৰ সৰ্ববৃহৎ সংগঠন অল ইণ্ডিয়া অৰ্গেনাইজেচন অৱ কেমিষ্টছ এণ্ড ড্ৰাগিষ্টছ (AIOCD)-এ ২০ মে’ ২০২৬ তাৰিখে “অল ইণ্ডিয়া ষ্ট্ৰাইক” ঘোষণা কৰিছে। সংগঠনটোৱে প্ৰকাশ কৰা পোষ্টাৰ অনুসৰি, এই ধৰ্মঘট বুধবাৰে পালন কৰা হ’ব আৰু সমগ্ৰ দেশত ঔষধ দোকানসমূহ বন্ধ ৰাখিবলৈ আহ্বান জনোৱা হৈছে।

AIOCD-এ চৰকাৰৰ ওচৰত কেইবাটাও গুৰুত্বপূর্ণ দাবী উত্থাপন কৰিছে। ইয়াৰ ভিতৰত আছে অনলাইনযোগে ঔষধ বিক্ৰী সম্পূৰ্ণ বন্ধ কৰা, বৃহৎ কৰ্প’ৰেট কোম্পানীয়ে আগবঢ়োৱা গভীৰ মূল্য ৰেহাই নীতি নিয়ন্ত্ৰণ কৰা আৰু নকল বা ভুৱা ঔষধ বিক্ৰী ৰোধ কৰা।

সংগঠনটোৱে লগতে ২৬-০৩-২০২০ তাৰিখৰ GSR 220 নিয়ম প্রত্যাহাৰৰ দাবীও জনাইছে। তেওঁলোকৰ মতে, এই নিয়মে স্থানীয় ঔষধ বিক্ৰেতাসকলৰ ওপৰত নেতিবাচক প্ৰভাৱ পেলাইছে।

AIOCD-ৰ সভাপতি জে. এছ. শিণ্ডে আৰু সাধাৰণ সম্পাদক ৰাজীৱ সিংঘালে জনসাধাৰণক সহযোগিতাৰ আহ্বান জনাইছে। সংগঠনটোৱে ৰোগীসকলৰ অসুবিধাৰ বাবে দুঃখ প্ৰকাশ কৰি কয় যে, এই আন্দোলন “অধিকাৰ সুৰক্ষাৰ বাবে” কৰা হৈছে।

“Chemists United – For Our Rights” শীৰ্ষক এই দেশজোৰা আন্দোলনে ঔষধ খণ্ডত নতুন বিতৰ্কৰ সৃষ্টি কৰিছে।