পূৰ্ব ভাৰতত গেৰুৱা প্ৰভাৱ বৃদ্ধি, বিদেশী সংবাদ মাধ্যমৰ উদ্বেগ বৃদ্ধি
- অসম আৰু পশ্চিমবংগত বিজেপিৰ শক্তিশালী উত্থান
- অসমত তৃতীয়বাৰৰ বাবে ক্ষমতাত বিজেপি-নেতৃত্বাধীন মিত্ৰজোঁট
- পশ্চিমবংগত বিজেপিৰ উল্লেখযোগ্য আসন বৃদ্ধি
- আৰএছএছৰ “হিন্দু সন্মিলন” আৰু ভোটাৰ সক্ৰিয়কৰণক গুৰুত্ব
- বিদেশী সংবাদ মাধ্যমসমূহে “হিন্দু ৰাষ্ট্ৰবাদ” আৰু “ধ্ৰুৱীকৰণ” লৈ উদ্বেগ প্ৰকাশ
- অসম চৰকাৰে ইউনিফৰ্ম চিভিল কোড আৰু চাকৰি সৃষ্টিৰ দৰে সিদ্ধান্ত গ্ৰহণ
অসম-বংগত গেৰুৱা ঢৌৰ উত্থান
সমগ্ৰ সমাচাৰ সেৱা
অসম, ১৮ মে’: শেহতীয়া বিধানসভা নিৰ্বাচনত পূৰ্ব ভাৰতত বিজেপিৰ গেৰুৱা প্ৰভাৱ উল্লেখযোগ্যভাৱে বৃদ্ধি পাইছে। অসমত বিজেপি-নেতৃত্বাধীন মিত্ৰজোঁটে একেৰাহে তৃতীয়বাৰৰ বাবে চৰকাৰ গঠন কৰিবলৈ সক্ষম হৈছে। ১২৬ সদস্যৰ অসম বিধানসভাত বিজেপিয়ে অকলেই ৮২টা আসনত জয়লাভ কৰে। সহযোগী দল এজিপি আৰু বিপিএফে ১০খনকৈ আসন লাভ কৰে। আনহাতে, কংগ্ৰেছ আৰু ইয়াৰ মিত্ৰদলসমূহ মাত্ৰ ২১খন আসনত সীমাবদ্ধ থাকে।
পশ্চিমবংগতো বিজেপিৰ উত্থানে ৰাজনৈতিক মহলত ব্যাপক আলোড়ন সৃষ্টি কৰিছে। বহু বিশ্লেষকে ইয়াক পূৰ্ব ভাৰতত “গেৰুৱা ঢৌ”ৰ বিস্তাৰ বুলি অভিহিত কৰিছে।
ৰাজনৈতিক পৰ্যবেক্ষকসকলৰ মতে, ৰাষ্ট্ৰীয় স্বয়ংসেৱক সংঘ (RSS)-এ এই জয়ত গুৰুত্বপূৰ্ণ ভূমিকা পালন কৰিছে। নিৰ্বাচনৰ পূৰ্বে অসমজুৰি হাজাৰ হাজাৰ “হিন্দু সন্মিলন” অনুষ্ঠিত কৰা হৈছিল। স্বয়ংসেৱকসকলে ঘৰে ঘৰে যোগাযোগ, সভা আৰু সামাজিক মাধ্যমৰ জৰিয়তে ভোটাৰসকলক সক্ৰিয়ভাৱে ভোটদানৰ বাবে উদ্বুদ্ধ কৰে।
বহু বিদেশী সংবাদ মাধ্যমে বিজেপিৰ এই সফলতাক নেতিবাচক দৃষ্টিভংগীৰে উপস্থাপন কৰিছে। ‘নিউয়ৰ্ক টাইমছ’-এ ইয়াক “হিন্দু ৰাষ্ট্ৰবাদৰ বিপজ্জনক বিস্তাৰ” বুলি আখ্যা দিয়ে। ‘বিবিচি’-য়ে পূৰ্ব ভাৰতত বিজেপিৰ “দীঘলীয়া যাত্ৰা” বুলি উল্লেখ কৰে।
আনহাতে, ‘দ্য গাৰ্ডিয়ান’, ‘আল জাজিৰা’, ‘লে মণ্ডে’ আৰু ‘চিএনএন’-এ ভাৰতীয় গণতন্ত্ৰ, ধৰ্মনিৰপেক্ষতা আৰু ধ্ৰুৱীকৰণৰ বিষয়ত উদ্বেগ প্ৰকাশ কৰিছে। কিন্তু ‘ৱাশ্বিংটন পোষ্ট’-এ এই ফলাফলক ২০২৯ চনৰ লোকসভা নিৰ্বাচনৰ পূৰ্বে প্ৰধানমন্ত্ৰী নৰেন্দ্ৰ মোদীৰ ৰাজনৈতিক স্থিতি অধিক শক্তিশালী কৰাৰ দিশত গুৰুত্বপূৰ্ণ বুলি মন্তব্য কৰিছে।
মুখ্যমন্ত্ৰী হিমন্ত বিশ্ব শৰ্মাৰ নেতৃত্বত নতুন চৰকাৰে প্ৰথম মন্ত্ৰীসভা বৈঠকতেই ইউনিফৰ্ম চিভিল কোড (UCC)-ৰ খচৰা বিধেয়ক অনুমোদন কৰিছে। এই বিধেয়ক মে’ মাহৰ বিধানসভা অধিৱেশনত উত্থাপন হোৱাৰ সম্ভাৱনা আছে। লগতে, পাঁচ বছৰত দু’লাখ যুৱক-যুৱতীক চৰকাৰী চাকৰি দিয়াৰ লক্ষ্যও ঘোষণা কৰা হৈছে।
চৰকাৰে বিদেশ ভ্ৰমণ সীমিতকৰণ, নতুন চৰকাৰী বাহন ক্ৰয়ত স্থগিতাদেশ আৰু বৈদ্যুতিক বাহন ব্যৱহাৰৰ দৰে ব্যয় সংকোচনমূলক সিদ্ধান্তো গ্ৰহণ কৰিছে। ইয়াৰ উপৰিও, ভাৰত ৰত্ন ভূপেন হাজৰিকাৰ জন্মশতবাৰ্ষিকী উপলক্ষে গুৱাহাটীত এটা বিশেষ সংগ্ৰহালয় স্থাপনৰ সিদ্ধান্ত গ্ৰহণ কৰা হৈছে।
About The Author
