ভাৰতৰ সামুদ্ৰিক খণ্ডত মহিলাৰ অংশগ্ৰহণ ৩৪০% বৃদ্ধি: সৰ্বানন্দ সোণোৱাল

২০২০ চনৰ পৰা সামুদ্ৰিক খণ্ডত মহিলাৰ অংশগ্ৰহণ ৩৪০% বৃদ্ধি
নতুন দিল্লীত অনুষ্ঠিত Indian Ocean Dialogue-ত ঘোষণা কৰে কেন্দ্ৰীয় মন্ত্ৰী সৰ্বানন্দ সোণোৱালে
‘Sagar Mein Samman’ উদ্যোগে মহিলাৰ সুৰক্ষা, সন্মান আৰু নেতৃত্বক অগ্ৰাধিকাৰ দিছে
ভাৰত বৰ্তমান Indian Ocean Rim Association (IORA)-ৰ ২০২৫–২৭ কাৰ্যকালৰ সভাপতি দেশ
সামুদ্ৰিক সুৰক্ষা, ব্লু ইক’নমি, জলবায়ু পৰিৱৰ্তন আৰু আঞ্চলিক সহযোগিতাক লৈ আলোচনা

Sagar Mein Samman’ উদ্যোগৰ জৰিয়তে মহিলাসকলক নেতৃত্ব আৰু সন্মানৰ সুযোগ প্ৰদান; ভাৰতৰ ব্লু ইক’নমি দৃষ্টিভংগীক অধিক শক্তিশালী কৰাৰ লক্ষ্য

সমগ্ৰ সমাচাৰ সেৱা
দিল্লী, ৮ মে’: ভাৰতৰ সামুদ্ৰিক খণ্ডত মহিলাসকলৰ অংশগ্ৰহণত উল্লেখযোগ্য বৃদ্ধি দেখা গৈছে। কেন্দ্ৰীয় বন্দর, জাহাজ চলাচল আৰু জলপথ মন্ত্ৰী সৰ্বানন্দ সোণোৱালে জানিবলৈ দিয়ে যে ২০২০ চনৰ পৰা এই খণ্ডত মহিলাৰ অংশগ্ৰহণ ৩৪০% বৃদ্ধি পাইছে।

নতুন দিল্লীত ৭ আৰু ৮ মে’ত অনুষ্ঠিত ১০ম Indian Ocean Dialogue-ত ভাষণ দি তেওঁ কয় যে প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰত অধিক অন্তৰ্ভুক্তিমূলক আৰু ভৱিষ্যতমুখী সামুদ্ৰিক কৰ্মশক্তি গঢ়ি তুলিবলৈ কাম কৰি আছে।

সোণোৱালে কয়, ‘Sagar Mein Samman’ৰ দৰে উদ্যোগে মহিলাসকলক সামুদ্ৰিক খণ্ডত সন্মান, সুৰক্ষা আৰু নেতৃত্বৰ সুযোগ প্ৰদান কৰিছে। তেওঁৰ মতে, ভাৰতৰ সামুদ্ৰিক কৌশলত সুৰক্ষা, সংযোগ আৰু টেকসই উন্নয়নৰ লগতে “মানৱীয় দিশ”কো সমান গুৰুত্ব দিয়া হৈছে।

তেওঁ লগতে কয় যে ভাৰত মহাসাগৰ কেৱল ভৌগোলিক অঞ্চল নহয়, ই বিশ্ব বাণিজ্য, শক্তি যোগান আৰু সাপ্লাই চেইনৰ এক গুৰুত্বপূর্ণ জীৱনৰেখা। আঞ্চলিক স্থিৰতা আৰু সহযোগিতা নিশ্চিত কৰিবলৈ আন্তঃৰাষ্ট্ৰীয় আইন মানি চলাৰ ওপৰত তেওঁ জোৰ দিয়ে।