টিচিএছ নাছিক ‘জিহাদ’ কাণ্ডত মুখ্য অভিযুক্ত নিদা খান গ্ৰেপ্তাৰ

টিচিএছ নাছিক BPO ইউনিটৰ স্থগিত কৰ্মচাৰী নিদা খান গ্ৰেপ্তাৰ
ধৰ্মীয় চাপ, যৌন হাৰাশাস্তি আৰু জোৰপূৰ্বক ধৰ্মান্তৰণৰ অভিযোগ
অন্ততঃ ৬ গৰাকী মহিলাই দাখিল কৰিছে অভিযোগ
SIT-এ আন্তঃৰাষ্ট্ৰীয় সংযোগৰ দিশতো তদন্ত আৰম্ভ কৰিছে

প্ৰায় এমাহ পলাতক থকাৰ পিছত আৰক্ষীৰ জালত অভিযুক্ত

সমগ্ৰ সমাচাৰ সেৱা
নাছিক, ৮ মে’: মহাৰাষ্ট্ৰৰ নাছিকত চাঞ্চল্য সৃষ্টি কৰা টিচিএছ ‘জিহাদ’ কাণ্ডত অন্যতম মুখ্য অভিযুক্ত নিদা খানক অৱশেষত আৰক্ষীয়ে গ্ৰেপ্তাৰ কৰিছে। টাটা কনচালটেন্সি ছাৰ্ভিচেছ (TCS)-ৰ নাছিক BPO ইউনিটৰ স্থগিত কৰ্মচাৰী নিদা খানক বৃহস্পতিবাৰে নিশা চত্ৰপতি সম্ভাজীনগৰৰ নাৰেগাঁওস্থিত বাসগৃহৰ পৰা আটক কৰা হয়।

প্ৰায় ২৫ দিন ধৰি পলাতক হৈ থকা খানৰ বিৰুদ্ধে একাধিক FIR ৰুজু হৈছিল। অভিযোগ অনুসৰি, তেওঁ সহ-অভিযুক্তসকলৰ সৈতে মিলি হিন্দু মহিলা সহকৰ্মীসকলক লক্ষ্য কৰি ধৰ্মীয় প্ৰভাৱ বিস্তাৰ, জোৰপূৰ্বক ধৰ্মান্তৰণ আৰু মানসিক চাপ প্ৰয়োগ কৰিছিল।

তদন্তকাৰীৰ দাবী অনুসৰি, অভিযুক্তসকলে প্ৰথমে মহিলাসকলৰ সৈতে বন্ধুত্ব গঢ়ি তুলি হিজাব আৰু বুৰ্খাক “আকৰ্ষণীয় জীৱনশৈলী” হিচাপে উপস্থাপন কৰিছিল। লগতে হিন্দু ধৰ্মীয় চিহ্ন আঁতৰাবলৈও উৎসাহ দিয়া হৈছিল বুলি অভিযোগ উঠিছে।

আৰক্ষীৰ মতে, কিছুমান ভুক্তভোগীক বুৰ্খা, ধৰ্মীয় গ্ৰন্থ আৰু ইছলামিক শিক্ষা প্ৰদান কৰা হৈছিল। আনহাতে, কিছুমান মহিলাক মালয়েছিয়ালৈ প্ৰেৰণ কৰাৰ পৰিকল্পনাও চলিছিল বুলি SIT-ৰ তদন্তত প্ৰকাশ পাইছে।

ইতিমধ্যে নাছিক আদালতে নিদা খানৰ আগতীয়া জামিন আবেদন খাৰিজ কৰিছে। আজি তেওঁক আদালতত হাজিৰ কৰোৱা হ’ব বুলি জানিব পৰা গৈছে। টিচিএছে ঘটনাৰ সৈতে জড়িত সকলো কৰ্মচাৰীক স্থগিত কৰি তদন্তত পূৰ্ণ সহযোগিতা আগবঢ়োৱাৰ কথা জানিবলৈ দিছে।